BO ÇI DIL WINDAYE
Min dilê xwe winda kir
li deştan û li çolan..
li ber çeman..
min dil winda kir
Bi min re gotin:
Me dilê te dît
li ser heyvê bû xeyal
li ser ewran difiriya
ne rast e..!
daleqandî bû
bi Şêx Seyîd û Seyêd Riza re
hat kuştin bi Elî Şêr re
bi Mûsa Enter re…
Min dilê xwe winda kir
di navbera por û çavên keçan de
li çiyayê Cûdî
di nav zinar û qûçan de
dilê min winda bû û heliya
di beriya hirç û maldaran de…
Min dilê xwe deribandibû
bo weşan, çandin, ziman, tore û zanînê
ji helbest û xame û defteran re
ji bo çi dilê min windaye..?
Tembûr şikestiye..
xame şewitiye..
kaxaz çiriye..
çav westiye..
na.. na.. ne raet e..
ya ku rast
hiş winda bûye
hêvî qetiye
dil xwe veşartiye..
lê dîsa ne rast e
dil herdem heye
omidiyê qut neke
xebata xwe berdewam bike
dil winda nabe .
1993
SALA NU HÊVIYE
Sala nu hêviye
demsal e..
dem evîn e..
reng, hulm û bîn e..
evîn e..
evîn ne hişyar e
tim dîn e..
sala nu Cûdî û Wan e
Mihabad e, Kirmanşa ye
ah û ahî..
Zaxo û Hewlêr e
Qamişlo û Efrîn e
tembûr e saz û bilûr e
Laşînd e..
ev jî îşev hişyar in
wek min naxwazin xwîna biratiyê birje…
Salek nu ye..
nuye sal
kanî doz û sûnd?
kanî peyman û al?
kanî hêvî û emal?
riya sala nu
bi dengê rişêşan xemgîn e
bi dengê qêrîna kuştiyan
pêşmerg û mirovên welat
dil dûr e ji şahiyê
şahiya evînê..
dil bi tenê melûl û xizan bû
bêbazdan û bêken bû
bêmey û bêxwarin bû
Sala nu dil sar bû
nizanim sedem çi bû!
reş û tarî bû şev
tu dûr bû
ez hişwindabûm
winda bûm
îsal li sersalê .
ŞIYÊ 1 1 1995
BUHUŞTA ERDÊ
Biriyên te çekên te ne
netirse ji rêkên dirêj
gava lêvêd min bigînin lêvêd te
wekhevbûnek mezin çêdibe..
em xwe biwestînin
ku tiştekî nu li jiyanê bibînin
ev dema demê ye..
firoşgeha dilan e..
gurîn û agir e..
Hawara gelê serberdayî ye
pir kes bêheval in
di zîndanan de sergerdan in
kulên min nayên gotin
rake ji ser dilê min barekî
ku ez bizanim tu destgirtiya min î!
ma ramûsanek jî tuneye!?
ka gavekê pêş de çeke
daliqîne şûrê xwe
mil, serî û sitûyê min qurbana te bin
li ser kaxezan xêz dikin
dengê bilûr û volqana eşqê
kulîkên gulistanan dipişkuvîne
hêvî dikim buhuşt li ser erdê be
da ku dermanê derdan hebe…
Şiyê 1995
DILO JARO
Dilo jaro rabe
ji xewa reş û were
temaşe bike
ji Firenkfort, ji Bon, ji Parîs, Rotirdem û Stokholmê
temaşe bike li welatê Kurdan…
Tayms ne Firat e
Sîn ne Dicle ye
Mûş nabe Lahay
ne jî Wan dibe Kopinhegin
temaşe bike welatê Kurdan…
Sitûxwar e agir û dûman hiltê ji her deran
nalenal e, jana giran e
bêhiş e
birîndar e
xanî wêran bûne
gund bêdibistan in
gelî bê av in
zarok bêdê û bav in
dilo jaro rabe
temaşe bike welatê Kurdan…
Li aliyekî
hay û hoye
qîl û qal û ceng e
li aliyekî mirin wek ejdehakî bi heft seriyan e
ketiye nav gel
lêdixe çep û rast e
em Kurd in
Kurd bûn
Kurd man
hîna dengê Ebdullahê Nehriye
Şêx Seyîd û Seyêd Rizaye
hîna Barzaniye
çiya ye..
çem e..
deşt e..
zozan e .
Heleb 1994