BUHARA DIL
Xerbî, xunava buharê
buhar xwastek û hêvî ye..
Buhara dil
sitranekê dike gazî
êşek û zivistanê
dike tar û mar..
Buhar e
gul in, yasemîn in, fil û binefş in
derya hişîn e, deşt bi genim û ciheye
çav zewq e.. dijan e
di nav pêlan da
dil hêvîdar e
genim û cihe
destpêka cotariya be.
WERE
Ana ew çiya
bi mij û dûman e
roj merhem e
bad derman e
dar silavê didin ezmanan
sitêrk dibarin
xunav e…
pelên şiqinan fît dikin
bilûr û keman e
tembûr û sitran e
dil şaş e bêhiş e
geh bi qehr e, geh geş e
diaxife bi zimanê evînê
bi hiqd û kîn e
geh Zîn e, Edûl û Şêrîn e
dil har û dîn e
dil heftê sal da şûn xwe
heftê sal derbas bû
bi hesret û nalîn
bi girî û şîn
bi şahî û şadimanî
geh Mem bû, geh Siyamend bû û Dewrêş bû
heftê sal e li benda devê deryê te me
di bax û bîstanê Eşqê da
bilbilê şadayê te me
rêk û benda te dinihêrim
diaxifim
Were dem ew dem e. 17-2- 1995
KOÇKIRIN
Gav bi gav..
jîna min digihe koçkirinê
û êşeka min jî..
ji berî ku em dûr bikevin
ji hev re bibêjin
çend gotin ji te re…
min pir hez kir
îro jî pir hez dikim
lê koçkirin dereng nabe
êşeka min xelas nabe
êşek çi ye?
çi ye eşq?
Dengê kemana nîva şevêye
seet sisê şevê ye.
NAS BIKE
Nas bike.. gundan..
nas bike.. çeman û newalan
tev nas bike
nas bike.. deşt û çiyan
nas bike..welatê xwe
gund û şar
derdora xwe
nas bike..bi mêvandarî
bi ciwanmerdî
nas bike hemû kesan
nas bike.. gelan
hez bike ji aştiyê
bimîn însan
nas bike..
gelan, welatan, hemû kesan
binivîsîn dastana azadiyê û serhildanê
bi çav û destan
û romanî
naskirin
xweş dike zimên
xweş diafirînin û lihev tînin
gotin û şoran
nas bike..
nivîskaran, hozanan
torevanan
nas bike
cotkaran.
ÎRO BAZAR E
Îro bazar e yekşem e
dinivisînim..
êşek û jana dilê min
avdana bîstanê gulên min
guhdarî me li deng û peyvandina we
dijwariya dê û bavê bilbilê min..
Mamostayêd min ên heja
em jî bibêjin helbest û çêrok û derewan…
dil şaye..
hişyar û agah e
mîna Cîgerxwîn dibêjim
kî me ez?
Bi hêdî hêdî bi lez bi lez
lê hêvîdar im her kes
roja welat hildayî ser çiyan
ronahî belav dibe
li dûziyê û deşt û çiyan
kî me ez?.
JÎNPEREST IM
Jînperest im
dinoşim mey
ji lêvên te yên sor
bi birîdarî
evîdarî
fireh bûme…
Dibezim..!
bi nalîn û hawar
bi nalîn û keser
nexwaş im
derman dixwazim
rev bi rev min koç kirî
ji ber jana di dil da
an ku bejna te nirî
gul peqîn ser mil da
heq û maf nîn e ji min ra
ez kuştîme ji te re
ji pê heyanî sera
bo sedema di dil da.