ME NIZANÎ BÛ
Xewnek şevan bû
Tê de kilam, mûzîk hebûn
Weha ez tenê bûm
Bihar bû, çawîr û çîmen bû…
Kulîlk bûn..
Asîman bû..
Bayekî hênik ji deryayê dihat
Ez bi tenê bûm..
Dem xweş bû
Tijî bû.. boş bû…
Bejn û bala tenik û dirêj…
Çavên kildayî…
Mil textê rewan bû
Dilê min siwarê zemîn bû…
Lê me nizanî bû
Rojekê cudahî dê hebe
Ew li vî aliyê behrê
Ez li aliyê din…!
Heyran heyran…!
Me nizanî bû…!
1994
DINYAK MIN HEYE
Çînçîn in, hechecîk in…
Gubelek û şehlûr in…
Bilbil in…!
Beybûn, gul û binefş in
Zarok tim li dora min in
Dinyak min heye
Gelî û newal in…
Çiya, deşt, beyaban û çol in
Derya, çem û gol in…
Karbidest in, sehsiwar û egîd inserbilind in…
Xwedîkar inne vala û tiral in…
Ne destvegirtî ne
Eniyên xwe vedibriqînin…
Merd in, azad in
Xudan fikir û şad in..!
Li dor xwe dibînim
Dar û rez û baxan…
Ewrên reş û hêrên zeytûnan…
Welatê min, welatê xêr û bêrê ye
Lê tarî ye…!
Li dor xwe dinirim !
Dixwazim rind bibînim
Karbidest in lê carcaran
Lehneta Feroon li wan dibare !
Hezar sal
Di ser me re buhortin
Û hêj em bendewar in…!!
1982
WELAT ÇI YE
Dibêjin:
Welat çiyaye
Deşt û çem û derya ye…
Welat gund û bajar e
Gelî û newal e…
Serzemîn û binzemîn e
Mehdan e, zîv û zêr e
Kevir û xak e
Şikeft e…
Neqeb û berqef e…
Derî û dîwar e
Xox û sêv, gûz û behîv e
Zeytûn û fistiq e…
Bişeng û çinar e
Zevî, lat û zinar e…
Ev tev welat û welatî ne
Xak û însan in..
Bi maf in
Bi hest û xwîn û can in…!
BIRATÎ ÇI YE
Welatê min mîna xaliyek Ecemî ye
Bi reng e, bi neqş e bi çîn e…
Çiyayên me sersipî û zîvî ne
Çem û zozanên me dilorînin…!
Bi eşq û evîn tu dibêjî: em bira ne !
Hezar sal in em bi hev re dijîn…!
Ev ne rast e !!
Şewitandina mal û gundan…
Talankirina keriyê bizin û miyan
Sêwîkirina zarokan
Bê dê û bav man…!
Ev biratî ye …?!
Gelî û deştên me bê av manev biratî ye..?!
Tu tim dewlemend mayî
Ez jî xizan û geda me!
Tu tim têr î û ez tim brçî me…
Ev biratî ye…?!
Tu xudiyê tang, top, tiving û balefir î…
Bi dest min de
Dasik û neynûk û xencer in…
Ev biratî ye…?!
Tu Tirk î..
Ez Kurd im…
Nabim Tirk…!
Ev e gunehê min….!!