GER TU DÛR BÎ
Ax..!
nizanim xêr e bêhiş im
bêçar im
dûrbûna te ji dil re pir giran e
ku anah tu dûr bî
alem ji min dûr e
li ser rûyê berfê feq vedayî
kurd dev vekirî mîna ejdeha
ger tu dûr bî
roj dikeve paş ewran
dilşikestî
lewre…
xwîn dadikeve ji lêvan
gel dibe mîna pezê bêşivan..
Dema ku tu dûr bî
şev tê û basik şikestî
aman.. aman…!
sitêrk didêgirîn
heyv bi birîn e
ezman reş û tariye
deşt bêjîn e..
çiya mest in..
çem dike qêrîn û bêdeng e
çev tê..
ne “mezmûra”.. “Dawûd” e !
ne neşîd el înşad e “Suleyman” e..
ne nalîna “Lêrmantofa” ye
li kela Qafdaxê ye…
Belê dengê rişêşan tê û diçirîne
dîwarê semtê..
ji geliyan heya geliyên din.
Ger tu dûr bî..
zarok, kulîk û pêmpilûk
sêwî ne..
li dor çeman kes nîn e
ne govend e ne dîlan e
li ser daran
ne bilbil dişîqin
ne dengê basikên teyran.
Tu evîn î..
hêvî yî..
dê û bav î..
baran û tav î..
tu ramûsan û silav î…
Dûr nebe kerm bike
ez şehîdê eşqê me
welatparêz im
bi doz û xêz im
heyrana te me herdem.