DI ZÎNDANA ŞEVÊ DE
Destgirtî û qelabend im
geh pêla dil radibe
şehsiwarê deştan, hemû deştan
bi tirs qedera xwe
ez didim ber dêwan
mîrê Botan im
serekê xortan im
can im..
hezar sal im
aşiq im, bi eşqê mest im
welî çi bikim
nexwaş im.. sist im..
Dil perwaz dike
serê çiyan û zozanan
dor xwe dinire
bi tenê di nîvê şevê de
sitûxwar û xizan e
hevalên ketiyan tune ne
bo vê jî şev dirêj e
şifaq dûr e, tal û şor e
çav aşiqê roja rengîn in
çima nayê?
di xew da mayî.
3-1-1996
RIYA DIL
Bi hiş û heyran
dil dikir perwaz û seyran
ne sînor ne dîwar
ne çem û ne ça
ne kevir û ne zinar
digere gund bi gund
bajar bibajar
melûl û melûl
sitûxwar û xizan
çend hêstir dibiriqîn li ser dêm
hêviya te bû, çû ava bêguman
roja te ana ber avaye
nivîna te seqa û sar e
dilo melûlo..
bi xewn û xeyala bibe mijûl
welatê te deşt û çol û beyaban e
çiyayên bilind û derendên asê
ma çima tu sitûxwarî, pal li ser masê?
noş dike jehrê ji kasê
kanî qelfê esmar û zeriyan..?
kanî govend û bazdan û dîlan..?
dewat bi dawî bû bûk çû mala zêve
şev daket sitêrk li ezman
li ser riyan kes nema
dilo jaro zûbe gav ke
ana ê bibare berf û baran
ji neqeb û berqefan derdibin
cinewirên çolan.
FÎDAKARÎ
Fîdekarê evînê me
Rêçenasê xorta me
Karperestê gel û karkera me
Yosifê Kenaan im
Evîndarê Zelîxa me
A tê veşartin?
Beyan e…
Bend û dîl im
Bi derd û kul im
Şahînşahê eşqê me
pir birîn im
Bi fîxan û bi qêrîn im
Zimanê serfiraza me
Tu gewhera guhê Nûr î
Çeleng û rengîn î
Bextê erdnîgariya welatê min reş e
Navbera şênî û civatan
Nebuye li dinya zanistiyê
Perçeperçe bûye
nizanim çeng reng in..?
Binêrin hûn cihê textê şerefxan
Xera bûye ji destê lawê tûran.
BIRÎN KÛR E
Hûr hûr e..
Dûr dûr e..
Kûr kûr e..
Hûr hûr e li ser milên min
Dûr dûr e ji dilê min
Kûr kûr e kula min
Evîndarî ew e bira
Ar û agir e
Mekanê Zardeşt û tirba Laleşê ye
Zendevista û kitêba reş e
Hozan dîn e geş e
Ez xemgîn im
Şaş û dininvsînim
Dilbirîn im
Belê aşiq û bêkul û şîn im
Dûr dûr e..
Hûr hûr e..
Ne tal e!
Ne şêrîn e!
Xencer e, şûr e
Şîqiniya ewraye
Berq û birûsk e
Hinek jî dengê tembûr, gîtar û bilûrêye
Here here, were were
Evîndarê te me
Birîn kûr e û rê dûr e.
PEYVA HOZANEKÎ
Îro nexwaşxane min ji xwe re kirî mekan
Belê cavêd min mîna teyran
Heyran û sekran in
Perwaz dikin
Li ser çiyayên bi berf
Mîna Xelat û Sîpanê…
Nexwaş bûme jana min di dil de ye
Mêze bikin dostino, dokturino
Birîna min li ser min polaye…
Ji zarokiya bêguneh
Li ser çavên diya hezîn û çeleng
Min dersa xwe ji wê û êşeka wê dibir
Wek hemû pîrekên Kurdan
Diya min jî êsîr û bindest bû
Bi kar û şuxul bû, westiyayî û mest bû..?
Carna hêdî hêdî hêsir ji çavan dibarî
Min nizanîbû ji bo çi ye…?
Geh bi xwe re dipeyivî…
Sal derbas dibûn
Mezin bûm ez
Pir dibistan xelas kirim
Hozan bûm ez…!
Eşqa diya min
Êşeka birçî û tazîbûna welatê min
Ji min re bû derd û qisawet
Bo çi em li deriyê beg û axa peya û geda ne?
Zehmetkêş, sêfîl û destgirêdayî virda wirda..!
Welat welat ez gerî û fitilîm
Diyar diyar nedisekinîm
Spartekoz bû mamosteyê xort û egîdên wî gelî..
Ji pêka Çaldêrana Meluon
Hemû xwîna mirovan
Seman û siwaran rijî
Ji şoreşa Abdullahê Nehrî
Ji serhildana Şêx Seyîdê Pîran
Ji hîrehîra şêr û pilingan
Li çiyayê Dêrsimê…
Ji qêrîn û hay û hoyan
Mîrên Soranê, Hekarî û Botan
Ji gelî û newalên xwînê li dîlman
Li ser serê Agirî
Bi nav û nîşan
Mirin, agir û xwîn
Perîşan û koçkirin em
Gund û bajar şewitandin
Bi gulle û topan
Xerdel û jehra ejdehan û maran
Esrê em helak kirin bi hezaran
Nexwaş im jana min jana jînê ye
Em nebûn ku bijin
Wek însanan
Fesadî û jihev heznekirin
Xiznî û xiyanetî
Kuştin û dizî
Mîkrob ketiye nav me
Mar û gur û dûşpişk
Dilîze di nav xeyalê me da
Xelastek li ku ye?.
Ey xweda…?!.
DU HOZAN
Heftê sal, heftê seq û sarî
Belê ne zivistan e
Umrê min tim buhar e
Pel hişîn in, gul in, yasemîn in
Çem in, kanî ne, çol û av û cobar e
Hişyar im evîndar im
Şehsiwar im
Belê tu mamosteyê min î
Bi zimanê dê û bav û kala
Bûme bilbil û sebeba bersivê
Sal derbas bûn bi şadî bi ah û girî
Bi xame, kaxez û tembûr
Bi qêrîn, berf û agir
Dem û zemên hinek dost in
Hinek jî neyar in
Îro li mekanê ez û Seydayê Cîgerxwîn
Me pal dida
Mêze dikim asîmana
Di diyariya min dijî Seyda
Û digot: ez ê bijîm 130 salî
Dora min.